Ауылдарҙың киләсәге үҙебеҙҙең ҡулда.
Республикабыҙҙа уңышлы эшләп килгән “Урындағы башланғыстарға булышлыҡ итеү” программаһы ауылдарға ҙур ярҙам итә .
Йәшәгән еренә ысын хужа булып, уның төҙөклөгө, матурлығы өсөн битараф ҡалмаған ауылдаштар булғанда, йәшәү һулышы һүрелмәйәсәк икәнен яҡшы аңлай сәпәштәр . Ошо көндәрҙә халыҡ тап ошо проект өсөн дәррәү тауыш бирергә ауыл клубына йыйылды ла инде.
Һәр ауылда тиерлек һыу мәсьәләһе халыҡтың ауыртҡан ере, шуға күрә Яңы Сәпәш ауылы халҡы ла һыу менән тәьмин итеү системаһын капиталь ремонтларға кәрәк тигән һығымтаға килде һәм проектта ҡатнашырға ҙур теләк белдерҙе. Ауылыбыҙ халҡы, һинең өсөн уңайлыҡтарҙы ситтән килгән кемдер тыуҙырмай, барыһы ла үҙебеҙҙең тырышлыҡтан тора тигән фекерҙә.
Йыйылыштан һуң ауыл халҡы китапханаға йүнәлде. Йыйылыусылар түңәрәк өҫтәл артында «Һыу – йәшәү сығанағы» темаһына әңгәмәне дауам итте. Төрлә дәлилдәр килтереп, ауыл тарихына ла күҙ һалып, саф ,таҙа һыу тураһында һүҙ алып барҙы ауылдаштар.
