Һәр кемдең көтөп алған байрамдарының береһе – Яңы йыл яҡынлаша.
Яңы йыл – һәр саҡ ниндәйҙер мөғжизә, теләктәрҙең тормошҡа ашыуын көтөү, бала саҡтан иң яратҡан байрамдарҙың береһе. . Барыһы ла мөғжизәгә ышанып, Яңы йыл байрамын көтә.
29 декабрь мәҙәниәт хеҙмәткәрҙәре лә ауылдаштары өсөн байрам сараһы ойошторҙо.
Байрамды асҡас, ауыл хакимиәте башлығы Рәфис Рәшит улы Яңы йыл менән ҡотлап үтте.
Байрамыбыҙға мәртәбәле ҡунағыбыҙ ,Башҡортостандың халыҡ сәсәниәһе, филология фәндәре докторы, билдәле фольклорсы, Салауат Юлаев ордены кавалеры, Башҡортостан Республикаһының һәм Рәсәй Федерацияһының Яҙыусылар союзы ағзаһы, М.Аҡмулла, Ғ. Әлмөхәмәтов премияһы лауреаты, Башҡортостан Республикаһының атҡаҙанған мәҙәниәт хеҙмәткәре, һәр яҡлап хөрмәткә лайыҡ шәхесебеҙ , яҡташыбыҙ Розалия Әсфәндиәр ҡыҙы Солтангәрәева ла ҡайтҡайны. Розалия Әсфәндиәр ҡыҙының ауылдаштарына теләгән изге теләктәре , китапханаға бүләк иткән яңы ғына баҫтырылған “Урал эпосы” китабы, балалар менән уйнауы байрам кәйефен күтәрҙе .
Артабан Яңы йыл кисәһе төрлө уйындар , йыр-бейеү менән дауам итте. Байрам кисәһе барыһына ла оҡшаны, рәхмәттәр әйтеп, теләктәр әйтешеп таралыштылар.
Һеҙҙе яҡынлашып килгән 2025 йыл менән ҡотлайбыҙ!Барығыҙға ла ныҡлы һаулыҡ, тыныслыҡ, именлек, оло шатлыҡтар ғына кисереп йәшәргә яҙһын! Һәр көнөгөҙҙән көс- дәрт алып, ҡыуаныс- мөхәббәткә сорналып ғүмер итегеҙ.Яңы йылға беренсе аҙымығыҙ изгелек булһын! Аҡ бәхеттәр һеҙгә!
